عارفين الاحساس ده؟

عارفين الشعور ده
عارفين لما تفتكر حاجه كده
تحس انها بتشدك لذكريات
انت مش عارف ايه الذكريات دى
بتشدك لحاجه كده
بحاجه انت مش عارفهاا
و ممكن تدخلك فى شعور كده غريب
حزن مع الم مع فرحه
الشعور ده

!!....عارفينه


عارف لما تسمع اغنيه كده
تلاقى نفسك بتبتسم من غير سبب
بس جواك حزين اوووى
و تلاقى شعور بدأ يدخل جواك
انت مش فاهمه
و تحاول تفهم ايه ده
وفى الاخر متفهمش

طيب عارف لما تروح تقف على البحر كده
وتاخد نفس عمييييق
بعديها تلاقى نفسك بتبتسم
بس جواك حاجه مش قادره تخرج
حاجه يمكن بتقطعك من جوه
و مش عارف تتخلص منها
عارفين الشعور ده



طيب عارفين

لما تبقى لسه صاحى من النوم
اليوم لسه مبداش اهو
وتلاقى نفسك على السرير لسه
و غصب عنك تنزل دمعه
ممكن تفضل ساعتين تعيط على المخده
المخده اللى تعبت مننا كل يوم
كل يوم يتحس بينا
قبل ما ننام
و تقوم من على السرير
و محدش يعرف حاجه

عارفين الشعور ده




عارفين لما تكونوا اصحاب متجمعين فى يوم كده
و كلكوا مهيسين و بتدحكوا
و اللى يشوفكوا من بعيد لبعيد
يقول الناس دى رايقه
وحياتها تمام اوى
و انتوا اصلا بتدحكوا بدل ما تعيطوا
و محدش حاسس بحاجه
و محدش فاهم حاجه
لا و ايه
محدش هيقدر اصل
انه لا يفهم ولا يحس اللى جواكوا

.....
طيب عارفين لما تكون الساعه 2 بالليل
و البيت كله نايم
بتبقى عايز تصرخ بأعلى صوتك
كفاااااااااااااااايه ......حراااااااااااااااااااااام
كفايه بقى...ما خلاص..
حرام عليكوا اوى كده
بس كفايه ايه..معرفش كفايه و خلاص



طيب عارفين الشعور ده
لما تكون راجع من يوم سبيشيل اوووووووووى بالنسبه ليك
و ترجع..متحكيش لحد من اللى فى البيت على اللى حصل
و يمكن متحكيش لحد خالص
و يمكن اصلا محدش يسالك
ولا يقولك تعالى يا حبيبى
عملت ايه
احكيلى ابسطنى معاك
تبقى عايز حد جنبك اووووى يفرح معاك كده
بس متلاقيش
و تروح قبل ما تنام تراجع اليوم ده كده
لقطات بسيطه
و فى ااخر يوم اجمل من رائع
و انت جاى تنام...تقعد تعيط
مع ان فى ناس كتييير يحسدوك على اليوم ده


طيب عارف
لما تحس انك عايز مساعده من اى حد
اى انسان
اى مخلوق
حاسس انت بتغرق
بتغرق فى ايه مش عارف
بس انت محتاج مساعده
محتاج حد ينجدك
مش عارف هتطلبها من مين
و حتى لو طلبت مساعده
هتتقوله ايه
عايزك تساعدنى و خلاص
هيرد و يقولك اساعدك فى ايه
تقوله حاسس انى بغرق
الحقنى
هيقولك بتغرق فى ايه
ما انت واقف قدامى اهو
انت محتاج مساعده
بس مساعده فى ايه انت مش عارف
و تفضل تغرق و مش لاقى مساعده



طيب عارفين
لما تكون عايز تسمع كلمه معينه مش شخص معين
كلمه ممكن تكون كلمه من حرفين بس
مش صعب عليه يقولها
وتلاقيه ولا بيتكلم
تحس انه تمثال
ما تتكلم بقى
طيب ما هو انا شايفاك بتقولها مليون مره
شايفها فى عينيك
حاسسها اوى
عايز تسمعها بقى
قوووووول
اتكلم
و لما يتكلم
تحس انه بيشفق عليك
!!!...بتشفق على
طيب لما انت كده
بتحسسنى بيها ليه من الاول اصلا
بتعيشنى فى الشعور ده
ليه من الاول..و لو للحظات
لما ده مش حقيقه

طيب عارفين بقى
لما تلاقى نفسك كده
عايش شعور جميل اوى
مع نفسك
انت بتحب جديد
انت عاااشق
بس اللى يدحك
مفيش حبيب
انت لوحدك
بتحب و خلاص
هو انت اااه بتحب
بس اللى بتحبه ده مش موجود
طيب هو فين
معرفش

طيب عارف لما تبقى عايز تسمع صوت حد معين اووى
واحشك اوى
عايز تسمع صوته
تطمن عليه
و تفضل مستنى
و مستنى..... ومستنى
و فى الاخر ميتصلش
لا و بعدين يتصل حد تانى
تقول اخيرا اهو
و ترد بلهفة
و تسمع صوت حد تانى
مش ده اللى كنت مستنيه



و الشعور اللى بتحسه دة كلو مش بيتوصف بكلمات اصلا
بيبقى عميق اوووى
بيبقى جاى من جواك
و مش عارف اصلا هو اتولد ازاى جواك
عارفين الشعور ده ؟؟
؟؟؟؟
يارب يكون الموضوع عجبكم
تحياتي رولا

الله الله الله الله عليكي ...
والله من اجمل المواضيع اللي قرأتها في حياتي ...
والصور معبرة جدا ...
الف الف شكر يا عسل

ميرسي يا احلي ادمن في الدنيا ده بس من ذوقك
ميرسي لمرورك ياقمر

لية كدة بكيتنى حرام عليكى

ماعاش ولا كان اللي يزعلك ياقمر
لو مدايقك الموضوع احذفه حالا

موهو من كتر مومعبر وصادق بكانى

الموضوع فوق الروعة بجد ربنا يخليكي و يسعدك
بكرة ان شاء الله كل شئ يبقي كويس

ويمكن يكون اسوأ
كل شيء جايز
ميرسي لمرورك ياسو نورتي التوبيك

طيب عارفين
لما تكون عايز تسمع كلمه معينه مش شخص معين
كلمه ممكن تكون كلمه من حرفين بس
مش صعب عليه يقولها
وتلاقيه ولا بيتكلم
تحس انه تمثال
ما تتكلم بقى
طيب ما هو انا شايفاك بتقولها مليون مره
شايفها فى عينيك
حاسسها اوى
عايز تسمعها بقى
قوووووول
اتكلم
و لما يتكلم
تحس انه بيشفق عليك
!!!...بتشفق على
طيب لما انت كده
بتحسسنى بيها ليه من الاول اصلا
بتعيشنى فى الشعور ده
ليه من الاول..و لو للحظات
لما ده مش حقيقه




الف شكر والله كلام صح ويجنن

طيب عارفين لما تكون الساعه 2 بالليل
و البيت كله نايم
بتبقى عايز تصرخ بأعلى صوتك
كفاااااااااااااااايه ......حراااااااااااااااااااااام
كفايه بقى...ما خلاص..
حرام عليكوا اوى كده
بس كفايه ايه..معرفش كفايه و خلاص
فعلا والله الكلام دا بيحصل كتير
مرسي اووووووووي يارولا ع الكلام التحفه دا والله كلام ميتوصفش باي كلام تاني

تسلمي ياقمر

وحشانى قوى قوى قوى التوبيك هايل بس بيدل على حالة حزن رهيبه ياترى مالك ياقمر انتى اكيد مش عارفانى عشان غيرت الاسم بتاعى بس بكرا الايام هاتوضحلك
احلى تحيه لاحلى رورو فى الدنيا
اختك حبيبتك

ميرسي لمرورك يا سمورة والحمد لله ان الموضوع عجبك
ميرو؟ انتي حيرتيني بجد ؟؟؟؟
انتي مين؟
وعموما ميرسي لمرورك ياجميل

رولا التوبيك بجد هايل
طول عمرك بتحسي بأحساس الناس
انا كنت حاسه وانا بقرا التوبيك انك كاتباه ليا انا
بجد روعة
ميرو لوانتي حد من اصحابها ياريت بس تعرفينا انتي مين
لاني عارفة اصحاب رولا كلهم
ممكن نكون نعرف بعض بردوا

اه الصراحة انا هاتجنن واعرف مين دي يا ايملي
فكك
وميرسي للكلام الرقيق ده

والله انتي دوختيني يارولا ايه يبنتي الكلام ده الجامد مش عارف الحق الموضيع

بس خطير اووووووي الموضوع وجميل اوووووووي

مرسي ياعسل

هههههههههه
عجبك ياجيمي؟

دلوقتي انتي بتضحكي علي ايه
انا غلطان

اعوذ بالله
ايه الدبش ده ماكنت لطيف من شوية

لالا اسف اصل الرد ده كنت هاحطه في الوبيك بتاعك التاني

معلش اتلغبت

طبعن عجبني

هههههههههههههههههههه
اوكشة ميرسي ويارب كل توبيكاتي تعجبك

very nice topic

موضوع في الصميم

SomeOne

ميرسي اوي يا some one
ده بس من ذوقك

ياواد يا شديد ياللي بتعجب الكل انت

جامد اوى يا رولا بجد
كلام مميز جدا
وحساس اوى ومؤثر كمان
تسلم الايادى يا ارق ليدى