يبقى انت اكيد..اكيد فى بلدى...موضوع للتسليه والنقاش

انا عايز اتجوز ... اهئ اهئ اهئ

زمان فى الافلام الابيض و اسود كنا نشوف عبد الحليم و هو بيكلم عبد الوارث عسر ة يقوله :
عبد الحليم : انا عايز اتجوز يا بابا
عبد الوارث عسر : و ماله يابنى ... هو انا افديك الساعة ... يا زييييينااااااب تعالى ... ابننا عايز يتجوز
تيجى فردوس عبد الحميد : لولولولولولولولىىىىىى يا الف نهار ابيض يا الف نهار مبروك .... و دى مين اللى امها دعيالها دى ؟؟؟
عبد الحليم : اسمها سميحة ... بس يارب اهلها يوافقوا
فردوس عبد الحميد : يوافقوا ؟؟؟ يا ندامة ... لاهما حيلاقوا احسن منك فين دا انت زينة الشباب و راجل ملو هدومك و معاك التوجيهية و مستوظف باشكاتب قد الدنيا و مربوطلك مهية تلاااااتة جنيه ... و لو مارضوش يا ضنايا انا اللى حخترلك .. حجوزك بثينة بنت ام فاروق جارتنا .. بنت لهلوبة و مأدبة ... يا سلام ؟؟ دا انت تقعد على البساط و تنقى ست البنات
عبد الحليم يتمسك بحبيبته : بس انا بحب سميحة يا ماما و لا يمكن اتجوز غيرها
عبد الوارث عسر : بس انت عارف يابنى ان العين بصيرة و الايد قصيرة و انا راجل سريح على باب الله .. بس ليك عليا انى حبذل كل جهدى عشان اساعدك
عبد الحليم : لا يا بابا انا اللى حتكفل بكل حاجة و انا و هى حنكافح سوا
و ينتهى الفيلم على مشهد الفرح و هما فى الكوشة

منظر يستفز اى شاب فى وقتنا الحالى ... ليييييييييييه ؟؟؟؟!!!!

تعالوا نشوف سيناريو الافلام دلوقتى

ييجى احمد حلمى لعبلة كامل و يكلمها
احمد حلمى : ماما .. انا بصراحة كدة فى بت بحبها و اتجوزها
عبلة كامل( بطلعتها المعروفة ) : تت ايه ياعين امك ؟؟؟ انت اتهبلت يا واد ... هو انت حيلتك حاجة يابن الفقرانة .. دا انت بعد بكالريوس تجارة اشتغلت صراف بنك و كل اللى حيلتك 400 جنيه مايأدوكش عيش حاف ......... يا ابراهييييم الحق ابنك
يجى حسن حسنى : فى ايه ؟؟؟ :
عبلة كامل : ابنك عايز يتجوز
حسن حسنى : يا نهار اسود .. انت اتجننت ؟؟ هو انا لاقى ااكلكم لما حجوزكم ... منيييييييييييييييين ؟؟؟
احمد حلمى : يا بابا دا انت كنت مدير عام اد الدنيا
حسن حسنى : كنت .. كنت ... دلوقتى ع المعاش اجيبلك منين تمن الشبكة و المهر و الشاااااااااااقة و الجهااااااااز ... حرام عليكوا ..
و قعد حسن حسنى و عبلة كامل يضربوا احمد حلمى
طاااااااااااخ طييييييييييخ طوووووووخ
و ينتهى الفيلم على مشهد احمد حلمى و هو واقف فى البلكونة متشلفط من كتر الضرب و بيستعد عشان يرمى نفسه من الدور الخامس

يعنى الراجل السريح اللى ابنه توجيهية وبياخد 3 جنيه عرف يجوز ابنه و الراجل اللى كان مدير عام سابق و ابنه بكالريوس تجارة و بياخد 400 جنيه مش عارف يجوز ابنه

اذن نستنتج من المشهدين دول ان الشغل ليه علاقة بالجواز ؟؟؟ ولا البرادس ( المونى يعنى ) هى المتحكم فى مواضيع الجواز ؟؟؟

اذن نستنتج من المشهدين دول ان الشغل ليه علاقة بالجواز ؟؟؟ ولا البرادس ( المونى يعنى ) هى المتحكم فى مواضيع الجواز ؟؟؟؟

عارفين ايه اللى متحكم فى موضوع الجواز الرئيسى ..................؟؟؟؟؟؟؟؟؟؟؟؟؟؟؟؟؟
البناااااااااااااااااااااااااااااااات و الولااااااااااااااااااااااد

مش عارف كل بنت بتحلم بالشقة اللى فى مدينة نصر و الحتة البى ام و العفش الشيك و الانسر مشين و الواد اللارج اللى شبه حسين فهمى اللى تتفشخر بيه اودام صحابها و عيليتها و يتقال عليها... برافو يا بت .. واعية .. وقعت واقفة
الله يرحم اللى داب .. من الشبشب للقبقاب

جرى ايه يابنات ....؟؟؟
لا انتى بنت بشوات دا انتى ابوكى موظف بيجرى و شقيان عليكى انتى و اخواتك
و الحتة البى ام و البقليل اوى تبقى فيرنا ... الله يرحم الاوتوبيس اللى بتركبوه ولا علبة الصفيح اللى عند ابوكى اللى بتتكوموا فوق بعض فيهاو لو كان ربنا كارمك اوى يبقى ابوكى عنده حتة لانوس مأريحة اكل عليها الزمان و شرب
و العفش الشيك .... و النبى تتوكسى .. بذمتك امتى اخر مرة غيرتوا فيها العفش ؟؟ دا ان كان اتغير اصلا من يوم ما الوالد و الولدة غلطوا و اتجوزا
و الواد اللارج اللى شبة حسين فهمى ؟؟؟ ماهو لو سعادتك ليلى علوى ممكن يبصلك حسين فهمى ياختى لكن لو سعادتك عائشة الكيلانى مايبصلكيش حتى عبد الله مشرف
و بعدين اللارج الغنى ده حيجيلك انتى ليه و يسيب بنت السفير الفلانى و لا بنت الوزير العلانى و لا بنت رجل الاعمال الشهير الملانى
قولى بس يارب يتقدملك حد
و شقة مدينة نصر ... طب لو راجل من ظهر راجل و اللى على راسك ده شعر تعالى ورينى الشقة اللى انتى ساكنة فيها فين

طب دا انتى بالطلبات دى عايزالك واحد اكبر منك ب 25 سنة عشان يعرف يجيب كل ده

و لا ننسى مصيبة الاباء
الراجل من دول يتقالوا مبروك بنتك جالها العدل و يلبسه الهم و يمسك و شه و هاتك يا لطيم
اشى طقم صينى اليابانى و اشى طقم شربات اسبانى و اشى طقم تيفال فرنساوى و اشى طقم اركوبال ايطالى و اشى طقم حلل ستانلس تركى و اشى طقم بايركس الاصلى و اشى شنطة المعالق الالمانى
لا و لااااااااااازم الدش ووشر ... الله يرحم ادين امك اللى دابت من غسل المواعين
يا مفترية ... انوا عندكوا اركوبال ولا بايركس ولا شنطة معالق
طب دانتوا حتى معندكمش طقم الستانلس ستيل
اللة يرحم الحلل الالمونيا اللى بتتوسل انكم ترحموها و تشحتوها بقى
لا وايه الدش ووشر و المايكروييف و التلاجة نوفروست و البوتاجاز البلت إن ..... الله يرحم اللى فات ... ماتعيشى عيشة اهلك

-------------------------------------

والولاد .... و هل ننسى افضالهم علينا ؟؟؟؟؟؟؟؟؟!!!!!!!!!!!!
الواد يدخل الجوازة سالت ايده من كل حاجة و كفاية عليه اوى ان عنده شقة اد الحوء و فى حتو معفنة
و كفاية على كدة الباقى على البنت و لازم تجيب احسن عفش و احسن جهاز .. اظاهر فاكريين ان البنت لازم تدفع تمن الشقة بردوا زيها زيه بس فى الجهاز ... انتوا اتعبطوا ؟؟؟؟؟
و كمان يقعد يفاصل فى متطلبات ابو العروسة
اصل اوضة النوم نجيبها ب 10 الاف .. لا يا عمى حجيبها ب 3 الاف جنيه ... اوضة نوم ايه اللى ب 3 الاف جنيه ؟؟؟ طب دا الراجل راعى ظروفك و قالك نجيبها ب 10 الاف بس ..يقوم قايل طب نخليها ب 5 الاف .. ولا حتى ب 7 الاف.. هى قوطة حنقعد نفاصل فيها ؟؟؟
الراجل من دول عايز يدخل الجوازة بمجهوده الذاتى و بس و كتر خير الدنيا انها لاقت عريس .. و لازم هى و ابوها يدفعوا تمن الامله العظيمة اللى حيبقوا فيها

---------------------------------------

و الاب يجيله العريس من هنا و كانه لقى لقية
بمنتهى الالاااطة و النفخة الكدابة انا عايز الفرح يكون فى الاوتيل الفلانى ... طب و الخطوبة يا عم الحج حتعملها فين ؟؟؟ تلاقى الالاطة فشت مرة واحدة و يقولك معلش يابنى اصل ظروفنا على ادينا و مش حنقدر نعمل خطوبة !!!!!!!!!! يعنى هو الواد جايلك من البنك المركزى ؟؟؟؟؟؟؟
و احنا عايزين الشبكة تكون ب 15 الف و الاحسن تجيبها خاتم الماظ عشان تكون زى اختها عشان ماحسيش انى ظلمت بنتى و انى ميزتها عند اختها .... هو انت حتجيب الشبكة من جيبك يابا عشان تظلم ولا ماتظلمش ؟؟؟؟؟؟؟؟؟؟؟
و طبعا الفستان عليك لأ وايه؟؟؟ الكوافير عليك و ما ادراكوا ما هو الكوافير و اقل كوافير دلوقتى ياخدله الف و لا الفين .... ليييييييييييييييييييييييييييه ؟؟؟؟ هى عربية حوديها التوكيل تغير قطع غيار يابانى ؟؟؟ هو حيعمل ايه زيادة ؟؟ مش فورمة شعر و شوية الوان يعنى مش حيضييف شئ للموضة العالميةولا حيلزقلها منخيرها فى افاها!!!!!!!!
لأ وبعد كل ده تتكتبلها القايمة بأسمها يعنى من الالف للياى بتاعها
و كمان تاخد مؤخر صداق 20 الف جنية
يعنى لو اتخانقوا و الشيطان زقزق فى عقله .... يبقى موت و خراب ديار .... ياختاااااااااااااااااااااااااااااااى

--------------------------------

و عايزين بعد كدة يجيلكوا عرسان ؟؟؟ منين ؟؟؟؟
ال و يقولوا نسبة العنوسة .. ماهو طبعا لازم تعلى
و تطلع اشاعة ان الولاد اكتر من البنات .... و حياتكم الولاد مرمية فى الشارع بس مش عايزة تتجوز ... ماهو حتتجوز منين
و تلاقى الولاد حتتفقعلها عين و تتجوز ان شالله تموت بعد ليلة الدخلة
و البنات قاعدة تعيط بدل الدموع دم مع صحباتها و تقول انا مش عارفة ليه مابيتقدمليش عرسان ؟؟؟؟

بقى بالذمة ده اسمه كلام يا عالم ؟؟؟؟؟

منقووووووووووووووووووووووووووووووووووووووووووووول

شكرا موضوع جميل ومسلي جدا بس علي فكرة مش معقول بردوة ان واحدة لما تيجي تتجوز تتجوز واحد اقل منها ف المستوي او مش هيقدر يعيشها ف مستواها اللي كانت فيه ونفس الامر بالنسبة للولاد بردوة لان اكيد اكيد هيجي اليوم اللي هيعيروا بعض بكده واصلا ده لو جوزهم كمل شوف كمية المشاكل اللي هتكون بينهم علشان كده البنت او الولد لازم لما يجوا يحبوا يفكروا بعقلهم الاول مش بقلبهم ويفكر مستقبلة او مستقبلها هيكون ازاي معاه لان الاهل بردوة ف اوقات كتيرة بتبقي ليهم وجهة نظر وبتطلع صح وجهة نظرهم علشان كده اللي يحب يحب بعقله اولا

اولا ميرسى جدا مى على مرورك

ثانيا انا معاكى ان التكافؤ بين العروسين مهم جدا جدا ده مفيش نقاش عليه بس انتى مش معايا ان فى مغالاه جامده جدا فى طلباتنا واحلامنا يعنى لو العريس لسه شاب فى بدايه طريقه هيجيب كل ده منين؟

ثالثا حكايه المعايره ده طالما الولد اختار بنت يتجوزها وهى وافقت على الارتباط ده او العكس سواء كانوا فى مستوى واحد او فى فرق فى المستوى يبقى خلاص تتحمل نتيجه اختيارها واختياره اما لو عايروا بعض يبقى خلاص كل سنه وهم طيبين

ميرسى كمان مره على مرورك ورأيك

ف حكاية المغالاة دي فعلا عندك حق المفروض يكون ف حدود المعقول او بمعني اصح علي حسب قدرة الشاب يعني يكون ف تقدير بردوة ان هو لسه شاب وف بداية حياته

بس كده وهو ده لب الموضوع لازم الناس تراعى ظروف الشاب واذا اردت ان تطاع فاطلب ما يستطاع

واعتقد ان المغالاه ده من اهم الاسباب فى ارتفاع نسبه العنوسه سواء للبنات او للشباب

ميرسى جدا لمرورك

أحييك 75 مره على موضوعك يا أبو هيما
بس انا عندي اعتراض في حاجه, دلوقتي الشباب الي لسه في بداية حياتهم 75% منهم مبيدفعوش ربع جنيه في حاجه ( ربنا يخلي بابا وماما وستو وجدو )
اما الشاب الشُليطي مٌليطي الي لسه في بدايته يفكر في الجواز ليه اصلا وهوا عارف انه مش في استطاعته ؟!
لما ربنا يفرجها وعلى الاقل يجيب شقة يبدأ يفكر في الحكايه دي ...
انما متجبليش شاب لسه امه بتصرف عليه ولسه كمان مشتغلش وتقولي دا عاوز يتجوز والدنيا مأزمه معاه بقى وابو حبيبته الي هيبقى حماه مصعبها عليه خالص والكلام دا ..
وبرضو أرجع واقولك ان مش كل الناس من النوعيه بتاعت ابونا الي فوق دا شبكه بي 15 الف ومؤخر صداق 20 الف
يا عم انا اعرف ناس مكتوبلها 200 جنيه !!
والقايمه والكلام دا, دا حق الزوجه مفيش نقاش
وربنا معاك ومعانا ع الايام الجايه واحييك تاني مره ع الموضوع يا هيما ..

زائر

هههههههههههه موضوع حلو جدا يا هيما وعندك حق فيه بس سؤال انت عرفت الحاجات ده ازاى؟ انت بسم الله ماشاء الله اللهم لا ار ولا حسد يعنى تقدر تتجوز فى اسبوع

انا مش بحسد انا بحقد بس

اولا ميرسى جدا يا كاسبر على مرورك ورأيك

بس زى ما فى ناس مكتوب لها 200 جنيه بس انا اعرف ناس مكتوب لها 100 الف وفى ناس مش مكتوب لها خالص

غير القايمه والحوارات ده بس سؤال والد العروسه اللى بيكتب الحاجات ده ليه؟ ده هو بيدى للعريس بنته مش مستامنه على عفش وحاجات فارغه

اما بالنسبه للناس اللى عندها بابا وماما وجدو وستو ربنا يخليهم للجميع دول كده كده بيساعدوا ماهو متقوليش ان شاب عنده 27 سنه يقدر يعمل كل المتطلبات ده لوحده ما هو مش رئيس جمهوريه حتى رئيس الجمهوريه المفروض مرتبه 5 الاف جنيه

شكرا لمرورك كمان مره

اما بالنسبه ليك انت يا محمد يا فاشل ار واحقد براحتك ما هو ده اللى جيبنا ورا

بس مش معنى انى اقدر اتجوز فى اسبوع ده معناه انى موافق على المغالاه فى طلبات كلا الطرفين

فهمت يا فاشل

ميرسى لمرورك

بص بقى يا جولدن اولا ميرسى ليك على الموضوع الجامد

ثانيا من حق كل بنت انها تحلم بعيشه كويسه ومش معنى كده انها تغالى فى الطلبات
بس على الاقل يكون فيه حد ادنى مثلا شقه حتى ايجار ومش كبيره بس المهم يبقى فيه شقه مش
هيعيشوا فى الشارع

ثالثا ان الاخ اللى داخل على جواز لازم برضه قبل مايقدم على الخطوه دى يكون جاهز ولو بحد ادنى
يعنى مش لسه بياخد مصروفه وعاوز يتجوز

رابعا الاب كلنا عارفين ان مفيش اغلى من الضنا وكل واحد نفسه اولاده يعيشوا مبسوطين ومتهنين

واعتقد ان الااهل معدوش بيكتروا فى الطلبات
دا المصيبه الاكبر ان لما الاهل بيتنازلو عن الطلبات دى العريس بيفكر انهم مدلؤين عليه وان مفيش عرسان غيره
ويبدا يسوء التناكه وبيعاير البنت بعد الجواز معندوش دم بعيد عنكم

جامد ياهيما بس هو دا حظنا المهبب

ههههههههههههههههههههههههههههههههههههههههههههه

شكرا ياعسل

اولا توتا ميرسى لمروك

بس محدش بيقول انهم يعيشو فى الشارع ومن حق البنت انها تحلم بميعيشه كويسه ده حقها الدستور يكفل لها ذلك

بس مش عيشه كويسه انها تطلب شقه فى عباس العقاد ولا مصر الجديده ولا المعادى او لازم يكون عند الشاب اللى متقدم عربيه

اما الاهالى لا انا لى واحد صاحبى اترفض وخطوبته باظت عشان ابو العروسه راسه والف برطوشه شقه ايجار قديم يا بلاش وواحد تانى لازم الفرح يكون فى القاعه الفلانيه ده مش مغالاه وتشدد برده

ميرسى على مرورك توتا ورايك

ميرسى يا منار انت اللى عسل يا قمر

انت ليه معلقتش على حكايه العريس اللى رايح يخطب ابيض

مش لازم يشتغل ويتعب عشان يبقى معاه فلوس يعرف يتجوز بيها
و مفيش حاجه بتيجى بالساهل

كمان مقلتليش رايك فى حكايه ابو العروسه اللى بيتنازل عن الطلبات الكتيره

وهو فى شغل فى البلدى يا توتا
انتى مش بتشوفى الجرايد
انا شايف ان المشاكل فى جميع الجهات
مثلا يعنى لو الشب على اد الحال والبنت كمان
واتفقو انهم يعيشو سوا ويكملو معا بعض
طوبه فضه وطوبه دهب الكلام اللى مبيكلش معا الاهل ده
على طول طبعا اهل العروسه لا ازاى جوز بنتى لواحد زى ده
بنتى لازم تتجوز ملو هدومه ويكون عنده وعنده
مثل تانى البنت غنيه شويا والواد يادوب بيمشى حاله بس البنت بتحبه
وعايزه واهلها موافقين يساعده طبعا الشب ده عنده كرامه ومشبيقبل حسنه
من حد علشان كدا يرفض فالحكايه تتفشكل
اما العكس لو كان الشب اللى غنى فاهله هيقوله ايه انت عايز تجيب لينا النقطه
انا احط ايدى فى ايد ناس زى دول حرام عليك يا اخى
بس فى الحاله دى من الشب ميسمعش كلام اهل
ارجو انى مكنش طولت عليكم

بجد الموضوع رائع ودة اللى موجود فعلا بس انا من رؤائيى العيب مش فى الشبابا العيب فى الحكومة ومهو لو الحكومة بتفكر صح وبتفكر فى اولادها وشعبها مكنش كل دة حصل وكمان المفروض ان اهل العروسة يفهمو الموقف اللى شباب فيةلانهم اكيد عايشين فى الدنيا وشايفين اللى بيحصل هو طبعا كل اب وام عايزين يبقى بنتهم عايشة عيشة حلوة بس بردو لازم يقدرو موقف اتلشباب واللى يضايق اكتر ان تلاقى اهل العروسة يعملوا كل دة ويكونوا عندعهم ولد ويوم ميجى يتجوز تلقية بيعمل اكتر من كد بس بجد موضوع حلو وكان فى سؤال عايزة اسئلة هو سؤال اهبل بس كل ماجى اسئل حد ميعرفش من اصحابى هى مين عائشة الكيلانى دي

اولا ميرسى جدا لمروكم كلكم وناقش راى كل واحد كده بقى

بالنسبه لكلامك يا توتا مفيش شاب بيروح يخطب ابيض لانه عارف هيكون الرد عليه عامل ازاى وهيكون منظره ايه هيتبص ليه بصة من تحت النظارة بصه حقيرة يعنى معندناش بنات للجواز يا كتكوت

اما حكايه يشتغل ويتعب ماشى معاكى انه لازم يكون بيشتغل وتعبان ومتمرمط كمان بس حكايه انه يشتغل ويتمرمط عشان يكون معاه فلوس يتجوز ويقدر على كل الطلبات ده يبقى يدينى ويديكى طول العمر يارب كده يبقى الشاب هيتجوز على سن 50 او 60 سنه يعنى يتجوز ويموت

اما حكايه ابو العروسة اللى بتنازل عن حاجات كتير ده بصراحه انا مشفتش حد كده عشان اقول رايى

ميرسى جدا لمرورك توتا

اما بالنسبه لكلامك يا اسلام لا فى شغل فى البلد ده بس اللى يدور بس هى المشكله الاجر اد ايه ؟؟؟؟؟؟ انت عشان تقدر على طلبات الجواز دلوقتى عاوز يكون مرتبك على الاقل 5000 جنيه عشان تقدر تتجوز وتفتح بيت وتربى اولادك كويس ومعتقدش ان فى حد فى بدايه حياته بياخد اجر زى ده

ميرسى لمروك يا مان

اما بالنسبه لكلامك يا نونى

انا معاكى ان ده عيب من عيوب الحكومه هم المفروض يبطلوا سرقه شويه عشان الشعب يقدر يعيش بس ده تيجى ايه فى المشاكل التانيه والبلاوى اللى بنشوفها كل يوم بس منقدرش برده نلقى العبء كله على الحكومه مش الحكومه اللى بتغالى فى الطلبات والمهمر والحوارات ده كلها هو فكر ناس

اما بالنسبه على موضوع مين عائشه الكيلانى فى ده صورتها وهى ممثله

يبقى انت اكيد..اكيد فى بلدى...موضوع للتسليه والنقاش 21230-

يبقى انت اكيد..اكيد فى بلدى...موضوع للتسليه والنقاش 21230-

يبقى انت اكيد..اكيد فى بلدى...موضوع للتسليه والنقاش Alfaris_net_1234254502

ميرسى جدا ليكم وعلى مروركم واراكم

ميرسى ليك بجد بس انا معاك بس الحكومة بردو هى اساس المشكلة من الاول ومشكلات تانية كتير وبردو انا معاك ان اهل العروسة اللى هعما بيعملوة دة بس لو كل شب دلوقتى بيشتغل زى اى شب فى بلد تانية وبيكسب كويس مكنش هيبقى موقف الاهل يهمة وانا معاك فى كل حاجة بس فى الاول بردو سبب الحكومة وميرسى على الصور الحلوة دية بالى فيها ههههههههههههه

ميرسى نونى على مرورك

» موضوع محيرني
» اليسيا - حلوة يا بلدى
» أغنية جامدة قوى ( حلوة يا بلدى ) أحمد فهمى & غادة عادل
» موضوع هام
» موضوع مهم